!ލޯބިވާ ދަރިފުޅަށް

މަންމަ އާއި ބައްޕަ މި ގޮނޑީގައި އިށީންދެ އިނދެ އަހަރެމެންގެ ކުޑަ އާއިލާ ކުރި ދަތުރާ މެދު ވިސްނާލާއިރު އަހަރުމެން ދަރިފުޅުގާތު ބުނެލަން ބޭނުންވާ އެތައް ވާހަކައެއް ހުރިއިރު، އެންމެ ފުރިހަމަ ބަސްތައް ނުފެނިދާނެ ކަމުގައި ވިޔަސް، އަހަރުމެންގެ އިޙްސާސްތަށް ދަރިފުޅަށް އިޙްސާސް ކުރެވޭނެ ކަމަށް އުންމީދު ކުރަމެވެ.

މަންމަ އާއި ބައްޕަގެ އަތުތެރޭގައި ތި ލޯބި ތުއްތު ފުރާނަ ހިފަހައްޓާލި ހިސާބުން ފެށިގެން އަހަރުމެންގެ ދިރިއުޅުން އަބަދަށްޓަކައި ބަދަލުވެއްޖެކަން އެނގުނެވެ. ތުއްތު ކުއްޖަކު ކަމުގައުވެ މިއަދު އަޖައިބު ކުރުވަނިވި ފުރާފުރިހަމަ ވަމުން އަންނަތަން ބަލަން މި ދުނިޔޭގައި ލެހެއްޓެވުމަކީ އަހަރުމެންގެ ހަޔާތުގައި ލިބުނު އެންމެ ބޮޑު ނިޢުމަތެވެ. މަންމަ އާއި ބައްޕައަށް ދަރިފުޅުގެ ކިބައިން ފެނިފައިވަނީ ހިތްވަރާއެކު ގޮންޖެހުންތަކާ ކުރިމަތިލާ، ކާމިޔާބީއަކީ ނިޢުމަތެއްކަމަށް ބަލައިގަނެ، ހުލްގާއި އަޚުލާގު ހެޔޮ އަދި އަހަރެމެންގެ ހަޔާތަށް ގެނުވި ނޫރެއްކަމުގައެވެ.

ދިރިއުޅުން ބުރަ ނުވަތަ ވަރުބަލިވެ ހިތްވަރު ދެރަވާކަމުގެ އިހުސާސް ކުރެވޭ ވަގުތުތަކެއް ވެސް އަންނާނެކަން ޤަބޫލު ކުރަންވާނެއެވެ. ނަމަވެސް މަންމަ އާއި ބައްޕަ ބޭނުންވަނީ ދަރިފުޅު އަބަދުވެސް މިކަން ހަނދާނުގައި ބަހަށްޓާށެވެ. އެއީ ދަރިފުޅުދެކެ މަންމަ އާއި ބައްޕަގެ ހިތުގައި އޮތް ލޯތްބަކީ ދުވަހަކުވެސް ފަނޑު ނުވާނެ ދާއިމީ، ފަހު ނޭވާ އާއި ހަމަޔަށް ވާނެ ލޯތްބެތްކަމެވެ. މަންމަ އާއި ބައްޕަ ދަރިފުޅާ މެދު ވަރަށް ފަޚުރުވެރިވަން، ހަމައެކަނި ދަރިފުޅު ހާސިލް ކުރާ ކާމިޔާބީ ތަކަކަށް ނޫނެވެ. އަހަރެމެންގެ ނަސޭހަތާ އެއްގޮތަށް ހިތްވަރާ އެކު ދިރިއުޅުމާ ކުރިމަތިލާކަމަށްޓަކާ ވެސްމެއެވެ.

ދިރިއުޅުން ކޮންމެ މިސްރާބަކަށް ގެންދިޔަކަމުގައި ވިޔަސް، ދަރިފުޅަށް އިހުސާސް އަދި ކިއެއްތަ ހިތަށްވެސް ނުގެނެވޭނެ މިންވަރަށް ލޯބިވާކަން އަދި މަންމަ އާއި ބައްޕަގެ ހެޔޮ ދުޢާ ވާކަން އަބަދުމެ ހަނދާނުގައި ބަހައްޓާށެވެ. ތިޔައީ އަހަރުމެންގެ ދެ ލޮލުގެ ނޫރެވެ. އަހަރުމެންގެ ފުރާނައެވެ. ހިތުގެ ފިނިކަމެވެ.