!އަނެކާ ގަޔަށް ޗަކަފެން ނުބުރުވާވެސް ވެހިކަލް ދުއްވޭނެ، މަގަކީ އެންމެންގެ ތަނެއް

ވާރޭވެހޭ ދުވަސްވަރު ވެހިކަލް ދުއްވާއިރު ރަނގަޅު އަޚްލާޤާއި މަގުމަތީގައި އެހެން މީހުންނަށް އިޙްތިރާމްކުރުމަކީ ކުރަންޖހޭކަމެކެވެ. މަގުމައްޗަކީ އެންމެން ބޭނުންކުރާ ތަނެކެވެ. އަދި ކާރު ދުއްވާއިރު އަޅުގަނޑުމެން ކުރާ ކަންތައްތަކުން އަޅުގަނޑުމެން ވަށައިގެންވާ އެންމެންނަށް ބައެއް ހާލަތްތަކުގައި ވަރަށް ބޮޑު އުނދަގޫތަށް ކުރިމަތިވެއެވެ. ޚާއްޞަކޮށް ވިއްސާރަ މޫސުމުގައެވެ.

ރަނގަޅު އަޚްލާޤު ފެށެނީ އަޅުގަނޑުމެން މަގުމަތީގައި އެކަނި ނޫންކަން ދެނެގަތުމުންނެވެ. ކާރު ދުއްވިޔަސް، ސައިކަލު ދުއްވިޔަސް، ނުވަތަ ހިނގާފައި ދިޔަސް، އެންމެންނަށްވެސް އިޙްތިރާމް ލިބެންވާނެއެވެ. މިކަން ވަކިން ވެސް މުހިންމުވަނީ ވާރޭވެހޭ ދުވަސްވަރު ނުރައްކާތެރިކަން އިތުރުވާތީއެވެ. ކޮންޓްރޯލްކުރެވޭ ސްޕީޑެއްގައި ދުއްވުމަކީ ވަރަށް މުހިންމު ކަމެކެވެ. އެއީ އަމިއްލަ ރައްކާތެރިކަމަށާއި އެހެން މީހުންނަށް އިޙްތިރާމް ކުރާކަން ދައްކުވައިދިނުމަށްޓަކައެވެ. މަތީ ސްޕީޑުގައި ދުއްވުމުން ކޮންޓްރޯލް ގެއްލުމުގެ ފުރުޞަތު އިތުރުވެ، ހިނގާ މީހުންނާއި އެހެން އުޅަނދުތަކަށް ޗަކަފެން ޖެހުމުގެ ފުރުޞަތު އިތުރުވެއެވެ.

ބޮޑެތި ފެންގަނޑުތަކުން ދުރުހެލިވުމަކީވެސް ވިސްނަންޖެހޭކަމެކެވެ. މިފަދަ ފެންގަނޑުތައް ގެއްލުމެއް ނުދޭ ކަމަށް ހީވެދާނެއެވެ. ނުވަތަ ބައެއް މީހުންނަށް މަޖާ ކަމަކަށްވެދާނެއެވެ. ނަމަވެސް އޭގެ ތެރެއިން ބާރަށް ދުއްވުމުން އެހެން މީހުންނަށް ފެން ޖެހި، އުނދަގޫވުމަށް މަގުފަހިވާކަމެކެއެވެ. އަދި މާލޭގެ މަގުތަކުގެ ހާލަތު ހުރިގޮތުން ވަޅުގަނޑަކަށް ވެއްޓުމަކީވެސް އެކަށިގެންވާ ކަމެކެވެ. ރަނގަޅު އަޚްލާޤު ހުރި ޑްރައިވަރަކު މިފަދަ ޙާލަތްތަކަށް ތައްޔާރުވާންވާނެއެވެ.

އުޅަނދު ރަނގަޅު ޙާލަތުގައި ބެހެއްޓުމަކީވެސް މުހިންމު ކަމެކެވެ. ޓަޔަރުގައި ރަނގަޅަށް ވައި ޖަހައި، ރަނގަޅު ޓްރެޑް ހުރުމުން ފެނުގެ މަތީގައި ވެހިކަލް ދުއްވުމުގެ ނުރައްކާ ކުޑަވެ، އަނެކާ ގަޔަށް ފެން ޖެހުން މަދުވާނެއެވެ.