"ގުޅާނަން ކޮފީއަކަށް"

"ގުޅާނަން ކޮފީއަކަށް" ނުވަތަ "ހިނގާ ކޮފީއަކަށް" މިއީ ދިވެހިންގެ ތެރޭގައި އާންމު ޖުމްލައެކެވެ. މިޒަމާނުގެ ދިރިއުޅުމުގެ ހަލަބޮލި ރިދަމްގައި ގިނަ ފަހަރަށް ކޮފީގެ ރިޗުއަލް އަކީ ގިނަ ބަޔަކަށް ހެނދުނު ހޭއެރުން ނުވަތަ ފޫހި ފިލުވާލައި ރިލެކްސް ވެލުމަށް ޤަވާއިދުން ފޮލޯ ކުރަމުން އަންނަ ޓްރެންޑެކެވެ. އާއިލީ ގުޅުން، ރައްޓެހިންނާއި އަދި ބައިވެރިއާ އާއި އޮންނަ ގުޅުންވެސް ރަނގަޅުކޮށްދޭ ހަތިޔާރަކަށް ކޮފީ ވަނީ ވެފައެވެ.

ތާޒާކޮށް ތައްޔާރުކޮށްފައިވާ އަދި މީރުވަހާއި ހައްޓަށް ދިރުމެއް ލިބޭ ކޮފީ ރަހައަކީ ދުވަހާ ކުރިމަތިލުމަށް ތައްޔާރުވެ ހުރުމުގެ ރަމްޒެކެވެ. ''ހެނދުނުގެ ކޮފީ ބޮއެގެން ނޫނީ އަހަރެން ފަންކްޝަންއެއް ނުކުރެޔޭ'' ބުނާ މީހުން އަހަރުމެންތެރޭވެސް މަދެއް ނޫނެވެ. އެކި ދިރާސާތަކުން އެނގިފައިވާ ގޮތުގައި މި މީހުން މި ދައްކާ ވާހަކައިގައި ހަގީގަތެއް އެބަ އޮތެވެ.

ކޮފީގައި ހިމެނޭ ޕްރައިމަރީ ސްޓިމިއުލަންޓް ކަމަށްވާ ކެފެއިން އަކީ ސަމާލުކަމާއި ނަފްސާނީ ވަރުގަދަކަން އިތުރުކުރުމުގައި ވަރަށް މުހިންމު ދައުރެއް އަދާކުރާ އެއްޗެކެވެ. އެއީ ސިކުނޑީގައި ހުންނަ އެޑިނޯސިން ރިސެޕްޓަރސް ބްލޮކްކޮށް، ނިދި އައުން މަދުކޮށްދީ، ހޭލެވުނުކަމުގެ އިހުސާސް ކުރުވައެވެ. މި ފިޒިއޮލޮޖިކަލް ރިސްޕޮންސްގެ ސަބަބުން ގިނަ މީހުންނަށް ހެނދުނުގެ ބްރޫ އަށް އިންސާފުކުރުމަށް ފަހު މާގިނައިރުތަކެއް ނުވެ ހޭލާ، ފޯކަސް ކުރެވޭ ކަމުގެ އިހުސާސް ކުރެވޭ ސަބަބެވެ.

އެހެންނަމަވެސް އަހަރުމެންނަށް ކަން ކުރެވޭ އާދައަކީ ހޭލާ ގޮތަށް ހުސް ބަނޑާ ހުރެ ކޮފީ ބުއިމުގެ ގޯސް އާދައެވެ. އަދި ދުވާލަކު ދެތިން ހަތަރު ފަހަރު "ކޮފީ ބްރޭކް" ނަގައި މާ ގިނައިން ކޮފީ ބުއިމަކީ ވެސް މައްސަލައެކެވެ. މިހެން ކަންކުރާ ނަމަ ބްލޯޓިންއަށް މަގު ފަހިވާނެ އެވެ. އަދި ސްޓްރެސް ހޯމޯންސް ގިނަވެ، ވަރުބަލިވުމާއި އެންޒައިޓީ އިތުރުވުން ފަދަ މައްސަލަތައް ވެސް ކުރިމަތި ވާނެ އެވެ. މާ ގިނައިން ކޮފީ ބުއިމާއި ހުސް ބަނޑާ ހުރެ ބުއިމުން ބޮލުގައި ރިހުމާއި ޑީހައިޑްރޭޝަނަށް ވެސް މަގުފަހިވެ އެވެ. އަދި ކެފެއިންއާ ނުލައި "ނުހޭލެވި" މަސައްކަތް ނުކުރެވޭ ހިސާބަށް ދިއުމަކީ ސިކުނޑި އޭގެ އަމިއްލަ ޒާތުގައި މަސައްކަތްކުރާ މިންވަރު ދަށްވާކަމެވެ.

ކޮފީއެއް ބުއިން ގޯހެއްނޫނެވެ. ގޯހީ ކެފެއިން މާއްދާއަށް ބަރޯސާވާންޖެހޭ މިންވަރަށް ހައްދެއްނެތި އޭގެ އަޅަކަށް މީހާ އާޚިރުގައިވާ ހިސާބަށް ދިއުމެވެ. މީގެ އިތުރުން ޒަރޫރީ ކަންކަމަށް ކުރަންޖެހޭ ޚަރަދު ބަހައްޓާފައި މިފަދަ ޚަރަދު ބޮޑު ދުވަސްވަރެއްގައި ކެފޭތަކުގައި ގެދޮރު އަޅައިގެން އެތިބޭ ތިބުން ގޯހީއެވެ. ކޮންމެ ކަމެއްގައިވެސް ލިމިޓެއް އޮންނަންވާނެކަން ގަބޫލު ކުރަންވާނެއެވެ.